Германија во понеделникот соопшти дека го отповикала својот амбасадор во Русија на еднонеделни консултации во Берлин по наводниот хакерски напад врз партијата на канцеларот Олаф Шолц.
Германија минатата недела обвини руски воени агенти за хакирање на највисоките ешалони на Социјалдемократската партија на Шолц и други чувствителни владини и индустриски цели. Берлин се приклучи на НАТО и на другите европски земји предупредувајќи дека руската сајбер шпионажа ќе има последици.
Форин Офис во Берлин во понеделникот соопшти дека владата го сфаќа последниот инцидент „сериозно“ и дека министерката за надворешни работи Аналена Баербок одлучила да го повика германскиот амбасадор Александар Ламбсдорф. Тој ќе се врати во Москва по една недела, се вели.
„Германската влада го сфаќа овој настан многу сериозно како однесување против нашата либерална демократија и институциите кои го поддржуваат“, рече портпаролката на Форин Офисот, Катрин Дешауер.
Баербок минатата недела рече дека руски воени сајбер-оператори стојат зад хакирањето на е-поштата на Социјалдемократите, водечката партија во владината коалиција. Официјални лица изјавија дека хакерите го искористиле Мајкрософт аутлук.
Германското Министерство за внатрешни работи во соопштение минатата недела соопшти дека хакерската кампања започнала уште во март 2022 година, еден месец по целосната инвазија на Украина од страна на Русија, со пристап до е-пошта во седиштето на Социјалдемократската партија на почетокот од декември.
Се наведува дека германските компании, вклучително и во одбранбениот и воздушниот сектор, како и цели поврзани со војната во Украина биле во фокусот на хакерските напади.
Официјални лица рекоа дека нападите траеле со месеци.
Односите меѓу Русија и Германија се напнати по рускиот напад на Украина. Германија и дава воена поддршка на Украина во тековната војна.
Извор: Асошиетед прес