Американскиот секретар за внатрешна безбедност Алехандро Мајоркас во средата вети дека „огромното мнозинство“ од илјадници мигранти кои сакаат да навлезат во Соединетите држави долж нивната југозападна граница со Мексико во наредните денови ќе бидат брзо протерани.
„Дозволете ми да бидам јасен, укинувањето на наредбата за јавно здравје од Одредбата 42 не значи дека нашата граница е отворена. Всушност, тоа е спротивно. Нашата употреба на нашите органи за спроведување на имиграцијата според Одредбата 8 од Кодексот на Соединетите држави значи потешки последици за луѓе кои нелегално ја преминуваат границата“, рече Мајоркас.
Некои гранични аналитичари велат дека околу 150.000 луѓе чекаат во северно Мексико за да се обидат да влезат во Соединетите држави.
Во Матаморос, спроти Браунсвил, Тексас, мигрантите постојано пристигнуваа во средата.
"Зошто не чекав термин? Затоа што утре е 11-ти и велат дека после 11-ти нема да можеме да влеземе. Затоа луѓето се брзаат. Никој не може да каже со сигурност, но мораме да одиме“, рече еден од мигрантите.
Мајоркас рече дека на Соединетите Држави „очајно им е потребна легислативна реформа за имиграцијата“, но Конгресот со години е во ќорсокак околу тоа какви промени во законите за миграција треба да се донесат.
Демократите велат дека се за промени за поттикнување на имиграцијата, додека републиканците зазедоа построг став за да го спречат напливот на мигранти во Соединетите држави.
Мигрантите со исклучително тешки околности, акутен медицински итен случај или кои се жртви на „тешка форма на трговија со луѓе“ или се соочуваат со „непосредна и екстремна закана“ во Мексико нема да бидат забранети според новите ограничувања за азил, според официјални претставници на администрацијата. Новото правило не се очекува да важи за деца без придружба.
