Прашањето за здравствената заштита беше главна тема на вчерашната демократска претседателска дебата во Детроит, со најголеми напади кон сенаторите Елизабет Ворен и Берни Сандерс, кои се наоѓаат на врвот на анкетните листи со можност да го победат претседателот Доналд Трамп на изборите следната година.
Ворен и Сандерс повикаа на промена на сегашниот систем на здравствена заштита, фокусиран на осигурување од приватни компании, кои им нудат здравствени планови на 150 милиони работници преку нивните работодавци.
Сепак, нивните ставови беа мета на напади од дел од нивните противкандидати.
„Не треба да и` кажеме на половина од државата, која има приватно здравствено осигурување, дека тоа е нелегално“, рече поранешниот конгресмен од Мериленд Џон Дилени, истакнувајќи дека тоа е лоша стратегија.
Сенаторката од Минесота Ејми Клобушар, пак, рече дека има храбри идеи за промена на регулативата за здравствена заштита, но, оти тие се базирани на реалноста.
Конгресменот од Охајо Тим Рајан поддржува план кој ќе им дозволи на граѓаните да купат владино осигурување ако сакаат, но, рече дека укинувањето на осигурувањето од приватните компании ќе биде рецепт за катастрофа.
Демократските кандидати, исто така, се напаѓаа и за имиграционите реформи, особено за практиката на разделување на децата од нивните родители.
Сандерс смета дека мигрантите не треба да бидат кривично гонети, додека Ворен верува оти треба да има граѓански тужби, а не кривични.
Градоначалникот од Индијана Пит Бутиџеџ рече дека не е битно колку години има кандидатот кој е во трка за претседател, туку каква визија има за државата.
Вечерва ќе биде втората дебата, при која се очекува поранешниот потпретседател Џо Бајден да се соочи со сенаторите Камала Харис и Кори Букер.
Пет други демократски кандидати не успеаја да се квалификуваат за дебатите во Детроит, додека оние што се дел од нив требаа да соберат донации од најмалку 65.000 лица и да добијат поддршка од еден процент во најмалку три различни анкети.
Facebook Forum