Законодавците во Вашингтон постигнаа двопартиски договор во средата за обезбедување на 8,3 милијарди долари за борба против ширењето на коронавирусот во САД.
Демократските и републиканските лидери во Сенатот и во Претставничкиот дом се согласија за финансирањето на предлог законот и се надеваат дека конечната верзија на мерката ќе биде усвоена од Конгресот до крајот на неделата.
Конечното усвојување ќе биде двопартиски успех што сега е невообичена работа во поларизираната политичка клима на Вашингтон.
„Кога се работи за здравјето и безбедноста на Американците, нема причина да ситничариме“, рече лидерот на демократите во Сенатот Чарлс Шумер.
Претседавачот на сенатската комисија за апропријации, републиканецот Ричард Шелби, кажа дека преговорите привршуваат и дека усвојувањето на мерката неделава „испраќа порака до американскиот народ дека ние се грижиме и дека ќе сториме се` што можеме“.
Мерката е три пати повеќе од барањето на претседателот Доналд Трамп за 2,5 милијарди за финансирање на владината борба против КОВИД-19, за кој истражувачите велат дека се ширел со недели без да биде откриен во пацифичкиот северозападен град Сиетл, државата Вашингтон, каде е епицентарот на заразата во САД.