Американскиот државен секретар Ентони Блинкен денес се сретна со емирот на Катар, шеикот Тамим бин Хамад Ал Тани, како дел од турнејата низ регионот, во која Блинкен ги фокусира дискусиите за ставање крај на конфликтите во појасот Газа и Либан.
Блинкен, исто така, денес се среќава со катарскиот министер за надворешни работи Мохамед Ал Тани пред разговорите со арапските претставници в петок во Лондон.
Додека една од точките на агендата на Блинкен е барањето да се зголеми хуманитарната помош за Палестинците во Газа, Франција беше домаќин на меѓународна конференција денес во Париз за да се соберат средства за помош на погодените од војната меѓу Израел и Хамас во Либан.
Франција вети 108 милиони долари, додека Германија соопшти дека ќе придонесе со 103 милиони долари за помош во Либан.
„Во блиска иднина, потребна е огромна помош за либанското население, како за стотиците илјади луѓе раселени поради војната, така и за заедниците што се нивни домаќини“, рече Макрон на конференцијата.
Израелската војска денес соопшти дека извршила нова рунда воздушни напади врз локациите за производство на оружје на Хезболах во јужните предградија на Бејрут.
Либанската војска соопшти дека тројца нејзини војници биле убиени во израелски напад додека спроведувале спасувачка операција во близина на селото Јатер во јужен Либан.
Израел рече дека неговата борба е со Хезболах, поддржан од Иран, а не со Либан, во конфликт што ги зголеми стравувањата од пошироки регионални непријателства.
Лекарите во Газа рекоа дека во израелски напад било погодено училиште што се користело како засолниште, при што биле убиени најмалку 16 луѓе.
На друг фронт денес, сириското Министерство за одбрана соопшти дека израелските воздушни напади го погодиле Дамаск, при што загинал најмалку еден војник, а биле повредени уште седум лица.
Израел ретко коментира за нападите врз цели во Сирија, но со години погодува тамошни цели поврзани со Иран како дел од кампањата да се запре трансферот на оружје за Хезболах и да се попречат иранските полномошници.
Турнејата на Блинкен вклучуваше застанувања во Израел и Саудиска Арабија каде што тој разговараше за важноста на запирање на борбите во Газа и обезбедување на ослободување на заложниците кои сè уште се држат од Хамас, поддржан од Иран.
Највисокиот американски дипломат, исто така, се осврна на евентуалниот крај на конфликтот, фокусирајќи се на дел од разговорите со официјални лица за безбедноста, управувањето и реконструкцијата на Газа.
Војната во Газа започна со нападот на Хамас на 7 октомври 2023 година врз јужен Израел, при што милитантите убија околу 1.200 луѓе и зедоа 250 луѓе како заложници.
Хамас сè уште држи околу 100 заложници, а се верува дека една третина од нив се мртви.
Во израелската контраофанзива во појасот Газа загинаа повеќе од 42.800 Палестинци, според Министерството за здравство на Газа, а Израел соопшти дека бројот на загинати вклучува неколку илјади милитанти на Хамас.
САД, Обединетото Кралство, Европската Унија и други, ги прогласија Хезболах и Хамас за терористички организации.
Некои информации во текстот се од Асошиетед прес, Франс - прес и Ројтерс
