Американскиот претседател Џо Бајден е домаќин на конгресните лидери на разговори во Белата куќа во обид да се обезбеди помош од милијарди долари за Украина и да се избегне претстојното затворање на американската влада.
Во дискусијата треба да учествуваат лидерот на мнозинството во Сенатот Чак Шумер, лидерот на малцинството во Сенатот Мич Меконел, претседателот на Претставничкиот дом Мајк Џонсон и лидерот на малцинството во Претставничкиот дом Хаким Џефрис.
Сенатот предводен од демократите претходно овој месец усвои двопартиски закон за безбедност од 95 милијарди долари, кој вклучува 61 милијарда долари за Украина, 14 милијарди долари за Израел, речиси 5 милијарди долари за поддршка на партнерите во Индо-Пацификот, вклучително и Тајван, и друга помош.
Џонсон вети дека нема да го донесе предлог-законот на гласање во Претставничкиот дом, велејќи дека американскиот народ сака законодавците да се фокусираат на домашните проблеми, вклучително и граничната безбедност, наместо да испраќаат помош во странство.
Шумер во вторникот рече дека тоа што не ја поддржува Украина ќе им покаже на сојузниците дека не можат да зависат од Соединетите држави.
Лидерите се соочуваат со краен рок во петок да се договорат за финансирање на некои делови од владата, вклучително и земјоделството, транспортот и некои услуги на ветераните. Друг рок чека една недела подоцна, кога ќе истече финансирањето на остатокот од владата.
Некои информации за овој извештај дојдоа од Асошиетед прес, агенцијата Франс прес и Ројтерс.