Акробации што го запираат здивот, заглушувачки прелети, падобрански спуштања можеа да видат граѓаните на аеро-митингот „Сто години македонска авијација“ што се одржа на спортскиот аеродром Стенковец, кај Скопје, а по повод еден век од формирањето на првиот аеро-клуб „Скопје“.
Учествуваа четириесетина пилоти од земјава, од Србија, Италија, Франција, Австрија. Присутните на митингот можеа да видат вешти акробации што ги изведоа професионалци и шампиони во акробатско летање.
Големо внимание привлекоа и авионите МИГ-29 од српското воено воздухопловство, како и авионот Еурофајтер од италијанските воздухопловни сили, кои изведоа атрактивни ниски прелети.
Со падобран беше спуштено македонското знаме, а прелети имаа и домашни полициски хеликоптери, како и армискиот хеликоптер МИ-17. Низок прелет имаа и владиниот авион „Лирџет“, како и еден патнички авион од моделот „Ербас А320“.
Посебен пиедестал беше посветен на едрилицата „Илинденка“, која се смета за прв македонски воздухоплов, произведена во 1955 година.
„Денеска, ние сме НАТО. Денеска ние ги немаме можностите на една, туку на 31 авијација на најмоќниот одбранбен сојуз во светот. Нашите пилоти денес, имаат пристап до одлични школи и најсофистицирани летала, кои ги гледаме и над нашето небо. Тоа го постигнавме со храбри државнички одлуки на кои сме горди, и кои нѐ водат понатаму кон остварување на нашата преостаната стратешка цел – членството во ЕУ“, рече премиерот Димитар Ковачевски на отворањето на аеро-митингот.
Гостин на настанот беше и српскиот министер за надворешни работи Ивица Дачиќ. Тој посака на небото да не летаат авиони со воени задачи.
„Србија и српскиот народ му посакуваат многу среќа и успеси во се што сакаат на македонскиот народ и на сите други граѓани на Република Северна Македонија и да даде Бог на овие простори да не летаат воени авиони со воени задачи, туку се да биде во рамките на аеромитинзи за луѓето да можат да уживаат во мирот и просперитетот“, рече Дачиќ.
Аеро-митингот траеше во текот на целиот ден, а присуствуваа повеќе илјади граѓани од земјава, но и од соседството.
Аеро-митинг „Сто години македонска авијација“: Акробации, прелети, падобранци