Во експлозија на камион-бомба во дипломатскиот дел на главниот град на Авганистан, Кабул, загинаа најмалку 90 лица, а повредени се преку 300 други.
Експлозијата одекнала во централното подрачје Вазир Акбар Кан, дом на странски дипломатски мисии и владините канцеларии, оштетувајќи десетици возила и околни згради.
Нападот се случил недалеку од амбасадата на Германија. Германскиот министер за надворешни работи Зигмар Габриел, преку Твитер кажа дека меѓу жртвите се припадници на авганистанското обезбедување, а голем дел од персоналот во амбасадата, бил повреден.
Безбедносните сили брзо ја затвориле областа, по што пристигнале и меѓународни сили за да помогнат во спасувачките напори.
Авганистанскиот претседател Ашраф Гани ја осуди експлозијата, нарекувајќи ја „нечовечки и кукавички напад“ против невини цивили за време на светиот исламски месец Рамазан.
Најновото насилство доаѓа во време кога претседателот Гани наредната недела треба да биде домаќин на конференцијата на соседните и земјите од регионот, на која ќе се разговара за начините за ставање крај на смртоносниот конфликт во Авганистан.
Facebook Forum