Во изјавата за новинарите, генералниот секретар му оддаде признание на специјалниот пратеник Лакдар Брахими за посредувањето во изборот на привремените ирачки лидери:„Мислам дека сите ние треба да признаеме дека процесот не беше совршен и оти се работи за тешки услови. Мислам дека имајќи ги предвид условите, уверен сум оти г-динот Брахими го стори најдоброто што можеше.“
Г-динот Анан не се извини за блиската соработка на неговиот пратеник со Привремената коалициона власт под американско раководство, ниту со Ирачкиот владејачки совет, за назначување на ирачките лидери.
Напротив, тој кажа „Го сторивме токму она што требаше да го сториме. ОН никогаш немале намера да назначат и да им наметнат влада на Ирачаните. Требаше да дискутираме со нив и имајќи ги предвид условите и факторите на теренот не е изненадувачки што новата влада е фомирана од мешавина од луѓе од Владејачкиот совет и од надвор.“
Тој посочи дека меѓу членовите на привремената влада ќе има шест жени и неколку нови лица кои не биле во владејачкиот совет.
Г-динот Анан кажа дека претходно денеска зборувал со претседателот Буш за начините за смирување на насилствата.
Тој изрази очекување дека членовите на привремената влада наскоро ќе дојдат во Њујорк на консултации со Советот за безбедност за резолуција во која ќе биде изложена транзицијата на Ирак кон демократски избрана влада.
Советот разгледува ревидирана нацрт-резолуција во која содржи зајакнати гаранции за суверенитет, чија претходна верзија наиде на критики од страна на неколку членови дека има недостатоци во оваа насока.