Хрватскиот претседател Стипе Месиќ е прогласен за почесен граѓанин на Пришина - признание за неговата поддршка за најновата балканска држава.
Косовското собрание одлучи да му го врачи признанието за време на посетата на Месиќ на 8-ми јануари. Месиќ во февруари ќе го заврши вториот мандат како претседател на Хрватска.
Реагирајќи на веста, српскиот министер за внатрешни работи и заменик-премиер Ивица Дачиќ го обвини Месиќ дека се меша во внатрешните работи на Србија.
Косово прогласи независност од Србија во февруари 2008-ма. Хрватска беше една од првите кои ја признаа неговата независност. Двете држави воспоставија дипломатски односи во јуни минатата година.
Претседателот Месиќ има кажано дека поддршката на Хрватска за независноста на Косово била признавање на „новата реалност во југоисточна Европа“.