Во јужниот дел на Тихиот Океан во тек е вадење на загинатите од урнатините по четирите големи цунамија предизвикани од подводен земјотрес во средата.
Речиси 150 лица загинаа во големите бранови што разурнаа цели села и туристички одморалишта на островите Самоа, Американска Самоа и Тонга. Земјотресот што ги предизвика беше со јачина од 8 степени.
Најмногу загинати има во Самоа – најмалку 110. Во Американска Самоа засега е потврдена 31 жртва, а во Тонга 7. Без покрив над главата останале десетици илјади лица.
Армиски транспортни авиони и бродови со спасувачки екипаж и натоварени со најпотребни средства од Австралија, Нов Зеланд и САД се на пат за настраданото подрачје.
Претседателот Барак Обама прогласи вонредна состојба за Американска Самоа.