„Милстед Автомотив“ е семејна фирма на влечна служба и поправка на возила во населбата Спринг во Хјустон, сојузната држава Тексас, веќе 37 години. Компанијата нуди три планови за здравствено осигурување за нејзините 150 вработени.
Но, потпретседателот на Милстед, Ејми Милстед Елзи, вели дека зголемувањето на 40 проценти од страна на осигурителните компании се одразува врз фирмата и врз нејзините вработени: „Ужасно е. Не можеме да си дозволиме 44 проценти поскапување на здравственото осигурување и тоа не` принудува да разгледуваме други планови и да направиме одредени кратења во бенефициите на здравственото осигурување“.
Таа вели дека компанијата сака да го задржи здравственото осигурување, како начин да го одржи здравјето и проктивноста на вработените: „Обичниот грип или настинката може да се трансформира во воспаление на грлото и вработениот ќе отсуствува од работа една недела. Доколку има здравствено осигурување, може да оди на лекар, да земе лек и да се врати на работа“, вели Елзи.
Елзи вели дека вработените во Милстед се како семејство, на многу начини поврзани. Скот Шафер, менаџер во одделот за проверка на трансмисијата на возилата и неговата сопруга Мишел, која работи во сметководството, велат дека здравственото осигурување е една од причините што ги држи на оваа работа. Но, обајцата се загрижени за нивната ќерка која имала здравствено осигурување до 25 годишна возраст, и потоа ги загубила бенефициите.
„Таа има 26 години и нема здравствено осигурување. Се уште оди во училиште и работи скратено работно време, но не може да си дозволи здравствено осигурување. Избегнува да оди на лекар“, се жалат родителите.
Скот и Мишел сметаат дека треба да се направи нешто за контрола на зголемувањето на трошоците за здравственото осигурување, но Скот вели дека е претпазлив за било кој план во кој е вклучена владината контрола.
„Не сум запознаен со деталите од реформата во здравствена заштита на владата, но сметам дека не е добра идејата за владина контрола во основните делови од системот за здравствена заштита“, подвлекува Скот.
Но, независно од причините, високите трошоци веќе ги принудуваат малите фирми да се определуваат за невклучување на здравствено осигурување во трудовите бенефиции.
Според асоцијацијата на мали бизниси, повеќе од 60 проценти од компаниите како Милстед им нуделе на вработени здравствено осигурување во 1993-та, но лани тој процент е сведен на 38, оставајќи им на вработените сами да се снаоѓаат за здравствено осигурување кое сметаат дека ќе можат да го плаќаат.