Американскиот потпретседател Џо Бајден пристигна во Ирак во претходно ненајавена посета.
Од Белата куќа велат дека за време на престојот, Бајден ќе се сретне со ирачкиот државен врв, а ќе ги посети и американските трупи.
Бајден е назначен да ја надгледува политиката на администрацијата на Обама во Ирак, додека САД преземаат чекори за повлекување на сите борбени сили од земјата, до август 2010 година.
Ова е трета посета на Бајден на Ирак годинава.
Минатата недела американскиот амбасадор во Ирак, Кристофер Хил истакна дека САД се на добар пат да го исполнат рокот за повлекување и покрај неодамнешното интензивирање на нападите во земјата.
Хил рече дека нападите се обид да се омаловажи ирачкиот народ, додека американските сили постепено ја напуштаат земјата.