Линкови за пристапност

Млади македонски парламентарци на програма во Вашингтон

  • Глас македонски


Неколку млади македонски парламентарци - и од власта, и од опозицијата - деновиве престојуваат во Вашингтон како гости на Меѓународниот републикански институт – ИРИ, на програма преку која се запознаваат со американските вредностите и демократските начела на владеење.

Пратеникот од ВМРО-ДПМНЕ и директор на партискиот Центар за комуникации Илија Димовски вели дека со колегите од двете најголеми политички партии во САД разговарале за односот на законодавецот кон електоратот и како тоа да се унапреди во Македонија.

„Оваа посета е добра поради тоа што група на млади пратеници од сите политички партии ќе имаат можност во пракса да видат како функционира американската демократија и на државно, и на локално ниво", коментира Димовски.

Христина Рунчева од ВМРО-ДПМНЕ влезе во пратеничките клупи на 24-годишна возраст.

„Драго ми е што имавме прилика да се сретнеме со конгресмен кој во времето на неговиот избор бил токму во истата позиција како и јас – најмлад во составот, и кој наоѓа соодветни начини и механизми како да пристапи кон граѓаните и како да го распредели правилно своето време – истовремено да биде присутен и во законодавниот дом, меѓутоа и на терен меѓу своите гласачи, меѓу своите бирачи", вели Рунчева.

За Александар Спасеновски од ВМРО ДПМНЕ била корисна паралелата меѓу функционирањето на американското општество и организирањето на политичкиот систем од една, и македонското, од друга страна.

„Мислам дека е многу важно за нас да научиме како оној систем на строга подлеба на власта меѓу законодавната, извршната и судската, при што сите меѓусебно соработуваат, но исто така и се контролираат, е една од главните информации што можеме да ја видиме и како искуство да ја понесеме во Република Македонија", коментира Спасеновски.

Горан Сугаревски е пратеник од опозициониот СДСМ: „На средбата со двајца конгресмени увидов една ситуација дека, за жал, во Република Македонија се` уште сме далеку од таква импементација каква што е работата на канцелариите на пратениците во градовите. За жал, кај нас се` уште не функционира голем дел на тие канцеларии", вели Сугаревски.

Од Вашингтон, пратениците заминуваат за сојузната држава Јужна Каролина, каде ќе се запознаат со владеењето на локално ниво и учеството на граѓаните во политичкиот процес.

XS
SM
MD
LG