Постигната согласност по резолуцијата за Северна Кореја

Седум клучни држави се согласија по нацрт-резолуцијата на Советот за безбедност на ОН со која би се вовеле нови остри санкции, вклучувајќи и целосна забрана за оружје, против Северна Кореја.

Во резолуцијата се осудува нуклеарниот тест на Северна Кореја како прекршување на претходните резолуции на ОН и налага воведување на дополнителни санкции.

Санкциите вклучуваат проширување на ембаргото за оружје против Северна Кореја, зајакнување на финансиските санкции, како и повикување на земјите да применат построги проверки на карго пратките на Северна Кореја.

Нацрт-резолуцијата е продукт на преговорите меѓу петте постојани членки на Советот - САД, Британија, Франција, Кина и Русија, на кои им се приклучија и Јапонија и Јужна Кореја.

Средбата во полн состав на Советот од 15 члена започна во средата наутро. Американската амбасадорка во ОН, Сузан Рајс изјави дека нацрт-резолуцијата ќе испрати мошне силен и кредибилен одговор на тестот на Северна Кореја.