Американскиот претседател Барак Обама повикува на нов
почеток во односите меѓу САД и муслиманскиот свет, велејќи дека циклусот на
„сомничавост и раздор", мора да заврши.
Во денешниот говор во Универзитетот во Каиро, Обама
истакна дека насилничките екстремисти ги експлоатираат тензиите меѓу
муслиманите и Западот. Тој истакна дека
САД и милијардата муслимани ширум светот мора да соработуваат за да се справат
со екстремизмот во сите форми.
Обама подвлече и дека планира да ги повлече американските
трупи од Ирак и да го остави Ирак на Ирачаните.
Обама истакна и дека САД се залагаат за повлекување на американските
војници и од Авганистан, но дека тој е определен да ја продолжи борбата против
екстремистите во оваа земја чија цел е да убиваат Американци и други.
Израелско-палестинскиот конфликт Обама го нарече главен извор на тензија и ја повтори потребата од постоење на посебна палестинска држава веднаш до Израел. Претседателот Обама додаде и дека Палестинците мора да се откажат од насилството, а Израелците мора да го признаат правото на Палестинците за постоење.
Американскиот лидер кажа дека САД се подготвени
за подобрување на односите со Иран и надминување на повеќедецениската недоверба.