Министерот за нафта на Саудиска Арабија, вели дека земјите членки на ОПЕК ќе го остават производството на нафта непроменето.
На денешната средба во Виена, членките на организацијата разговараа за цените на нафтата и нејзиното производство. Министерот за нафта на Саудиска Арабија Али Наими на новинарите изјави дека министрите за нафта на 12-те земји членки на ОПЕК, одлучиле да останат на сегашното ниво на производство на нафта на нешто под 25 милиони барели на ден.
Одлуката уследи по оптимизмот дека светските економии се опоравуваат од економската криза и побарувачката на нафта ќе се зголеми.
Американскиот претседател Барак Обама наредната недела во Ријад ќе се сретне со саудискиот крал Абдула, а фокусот на разговорите ќе биде цената на нафтата.
На њујоршката берза, цената на суровата нафта вчера беше на највисоко ниво во изминативе шест месеци - 63,82 долари за барел.