Жестоки протести против цивилни жртви во Авганистан

Група демонстранти фрлаше камења врз владини објекти во западниот дел на Авганистан во чевртокот, искажувајќи го така својот гнев поради неодамнешните цивилни жртви во земјата, за кои демонстрантите тврдат дека се резултат на американски воздушни напади.

Локалните власти велат дека полицијата отворила оган од оружје за да ја растури толпата во градот Фарах, во истоимената покраина. Според здравствени претставници, во нередите биле повредени четири лица, од кое едното од прострелна рана.

Толпата протестирала во врска со инцидентот што се случи во покраината претходно неделава, кога, како што наведуваат авганситански локални претставници, во американски воздушен напад и подоцнежна престрелка загинале најмалку 100 лица, главно цивили.

Американскиот секретар за одбрана Роберт Гејтс, кој од вчера е во посета на Авганистан, изјави дека група иследници го истражува случајот во месото Бала Булак. Гејтс рече дека слушнал извештаи дека борци на Талебан убиле цивили во напад со гранати и дека ги оставиле во местото, за да личи дека биле убиени од американските сили. И главниот командант на американските и силите на НАТО во Авганистан, генералот Дејвид Мекиернан во средата кажа дека првичните наоди укажуваат дека американските сили можеби не се одговорни за инцидентот.