Линкови за пристапност

Личните врски се важни за привлекување странски инвестиции

  • Глас македонски

19 години живее во Флорида, а по потекло од Охајо - Лу Влашо е новиот почесен конзул на Република Македонија во Неплс. Виталниот 71-годишен Американец од македонско потекло вели дека е важно да се биде вклучен во локалната политика. На тоа гледа како придонес во подобрување на средината.

Влашо е главен менаџер во ресторанот Вергина во Неплс на елитната петта авенија во градот. При нашата неодамнешна посета го запрашавме - Која е неговата мисија како почесен конзул на Република Македонија?

-Мојата мисија е да помогнам. Кога има потреба за такво нешто, знам многу луѓе и можам да ги поврзам. Немам официјални обврски, но знам кому да се јавам и работата да се заврши„ вели Влашо.


Внимателно следејќи ги настаните во Македонија, тој вели – најголем проблем за државата е отварањето нови работни места. Според него и тука може да се помогне.

Во ерата на модерната глобализација, личните врски со деловни луѓе формирани во еден подолг период се клучни за привлекување странски инвеститори.

Најдобар пример за тоа е влегувањето на гигантот Џонсон Контролс во Македонија, вели Влашо.

Во Флорида живеат меѓу 5000 до 10.000 Македонци. Влашо тука нашол одлична почва за практикување на своето мото - секој треба да е активен во својата локална заедница. Тој верува во конзервативната идеја и е вклучен во голем број добротворни активности.

На прелиминарните избори гласал за Мит Ромни, но денес е определен за сенаторот Џон Мекејн. Иако не е совршен, вели Влашо, секако е подобар од Барак Обама, за кого смета дека е премногу либерален и нема доволно искуство:

-Кога доаѓа изборот меѓу Мекејн и демократскиот кандидат, за мене нема избор. Ќе сториме се што можеме да го добиеме најдобриот претставник во Белата куќа.


Во графата против Обама тој вели дека е и потписот на сенаторот од Илиноис на про-грчки резолуции, против интересите на Македонија.

Секој глас одлучува, заклучува почесниот конзул и потсетува на изборите во 2000-та, кога претседателот Буш, токму во неговата Флорида извојува тесна победа врз против-кандидатот Ал Гор.

XS
SM
MD
LG