Портпаролот во Европското биро на Стејт департментот Чејс Бимер за нашата редакција изјави дека САД се длабоко загрижени за серијата извештаи за случаи на насилство, заплашување на гласачите и неправилности за време на предизборната кампања, што продолжија и на изборниот ден.
- Го повторуваме повикот до македонските политички лидери и институциите на државата да ги запрат и спречат таквите инциденти, да ги изведат извршителите пред правдата и да ја исполнат обврската да обезбедат изборите да бидат во атмосфера без насилство и заплашување и во согласност со македонските закони и високите меѓународни стандарди, изјави Бимер.
На редовниот дневен брифинг, портпаролот Шон Мекормак ја повика македонската влада да ги повтори изборите на оние места каде луѓето не можеле да го дадат гласот без закана од насилство и кривично да ги гонат одговорните. САД побараа на повторувањето на гласањето да бидат присутни соодветни сили за безбедност за да се создаде клима во која луѓето ќе може да гласаат.
Шон Мекормак
-Во голема мера сме убедени дека Македонија брзо и ефикасно ќе ја разреши оваа изборна ситуација и очекувам кога прашањето за името ќе биде решено, во контекст на НАТО, да се тргне напред со членството во НАТО, коментираше Мекормак на прашање дали изборните проблеми претставуваат чекор назад за македонските аспирации за влез во северноатлантската алијанса.
Њујорк Тајмс во денешното издание наведува дека македонските аспирации за членство во ЕУ и НАТО претрпеле тежок удар поради насилството и наводите за нерегуларности што ги засенија парламентарните избори. Весникот додава дека наместо изборите да бидат тест за демократски акредитиви на Македонија за евро-атлантската интеграција, насилството меѓу етнички-албанските ривалски групации ја истакнало репутацијата на земјата на проблематично дете на Балканот. И Интернешанал Хералд Трибјун наведува дека изборните инциденти се закануваат да ги поткопаат европските аспираци на Македонија.
Пукотници ги засенија изборите во Македонија - гласи насловот во метро-изданието на Вашингтон Пост. Весникот го цитира лидерот на победничката коалиција Никола Груевски дека Македонија има сила да тргне напред и енергија за членство во НАТО и ЕУ. „Македонскиот премиер победи на избори засенети од пукотници“, наведува Ју-Ес-Тудеј во насловот на извештајот во овој весник.
Фокс Њуз на својата Интернет страница ја пренесува длабоката загриженост на претставникот на ЕУ во Македонија Ерван Фуере. Интернет страницата на Блумберг, пак, ја цитира портпаролката на ЕК Марија Асимакопулу дека Комисијата е мошне загрижена поради насилството и повикува на смиреност и воздржаност.