Линкови за пристапност

Драма за името пред Генералното собрание


За прв пат од примањето во членство, македонскиот претседател беше во првата група говорници, на првиот ден, кога излагања имаа Генералниот секретар на ОН, Претседателот на Генералното собрание и претседателот на САД. Овој пат, тоа беше ден кога зборуваа и анимираниот претседател на Никарагва Даниел Ортега, непосредно пред претседателот Бранко Црвенковски, и иранскиот Махмуд Ахмединеџад, што го задржаа вниманието до доцните попладневни часови.

Па сепак, за Македонија, а секако и за Генералното собрание, ќе остане забележан моментот кога беше најавен претседателот Црвенковски. Претседателот на 62-то заседание на Генералното собрание Срѓан Керим ги изговори зборовите заборавени во тие простории – „Република Македонија“.

Претставникот на Грција, амбасадорот Џон Мурикис веднаш ја крена палката за приговор. Откако го сослуша, претседателот Керим одговори дека од таа позиција негова должност е да го заштити достоинството на секоја држава и го повика г-динот Црвенковски на говорницата.

Но, тоа не беше крај на драмата. Откако Црвенковски го прочита подготвениот говор, заврши со зборовите: „На крајот, пред ова Собрание, сакам да нагласам дека имато на мојата земја е и секогаш ќе биде Република Македонија!“

Чувствувајќи дека топката сега е на нивни терен, членовите на грчката делегација, набрзина, по излагањето на Црвенковски свикаа пред-конференција. Амбасадорот Мурикис на малата група новинари кои се одзваа на повикот, лично се потруди секој од нив, меѓу кои и вашиот известувач, да ги забележи острите зборови на протест: „Претседателот Срѓан Керим ја злоупотреби позицијата за промовирање национални интереси“. Амбасадорот отиде до таму да тврди дека е сигурен оти господинот Керим постапил по инструкции од неговата сопствена влада. „Ние го избравме да биде непристрасен и да постапува во согласност со неговите должности. Наместо тоа“, кажа амбасадорот, „тој се постави како претставник на својата земја“.

За господата Керим и Црвенковски, случајот, барем за ова заседание е затворен. И двајцата продолжија со активностите не навраќајќи се на инцидентот.

Во меѓувреме прашањето останува, а вечерва медијаторот Нимиц на планирана средба со претседателот Црвенковски се очекува да најави дека наскоро ќе излезе со нов предлог.

XS
SM
MD
LG