Генералниот секретар на ОН, Кофи Анан испрати група дипломати во регионот, а по телефон е во постојан контакт со светските лидери.
Претседателот Буш рече дека Израел има право да се брани, го обвини Хезболах дека предизвикал насилство, ја критикуваше Сирија за поврзаност со Хезболах и изрази загриженост за стабилноста на либанската влада како резултат на конфликтот.
Американскиот државен секретар, Кондолиза Рајс го повика Израел на воздржаност, но рече дека несомнено, земјите како Сирија и Иран го охрабруваат Хезболах.
Рускиот претседател Владимир Путин побара сите страни да прекинат со воени дејствија. Претходно, Москва се приклучи на француската оценка дека израелската офанзива е прекумерна.
Мартин Индјук, поранешен американски амбасадор во Израел смета дека ситуацијата може лесно да излезе од контрола и дека само интервенција на меѓународната заедница може да спречи натамошна ескалација.
Експертот за блискоисточни прашања од Лондон, Надим Шехади вели дека опасноста е голема поради тоа што во ситуацијата директно или индиректно се вклучени и други земји во регионот.
- Сите карти се во рацете на Сирија и Иран. Насилството во меѓувреме може да излезе од контрола, а тоа не е во ничиј интерес. Либан долго време е затекнат во средината.
Израел истовремено изведува операции и во Појасот Газа, каде палестинските милитанти минатиот месец грабнаа израелски војник.