Властите во сојузната држава Луизијана работат на евакуација на преостанатото население во Њу Орлеанс поради последиците од ураганот Катрина што причини кататсрофална штета на југот на САД и предизвика човечки жртви чиј број и натаму точно не се знае, но расте онака како што спасувачките екипи навлегуваат во сите погодени подрачја и ги испраќаат првичните извештаи.
Гувернерот на Луизијана Катлин Бланко вели дека разрушувањето е толку големо што некои делови на Њу Орлеанс, на пример, ќе треба одново да бидат изградени од темел. 80 проценти од градот е под вода, а комуникациските системи се во прекин.
ТВ-станиците од Луизијана јавуваат дека во делови на Њу Орлеанс е воведена вонредна состоја поради појави на грабеж на имот.
Властите во сојузната држава Мисисипи стравуваат дека невремето што предизвикало бранови високи 9 метри однело стотици животи во крајбрежниот град Билокси.
Крајбрежната стража соопшти дека спасила преку 1.000 лица од крововите на поплавени куќи. Илјадници припадници на Националната гарда даваат медицинска помош и пружаат засолниште на погодените од невремето.