Властите во западната американска држава Калифорнија соопштија дека најмалку 10 луѓе загинале во огромните шумски пожари што го опустошија градот Лос Анџелес.
Медицинскиот извештај на округот Лос Анџелес доцна во четвртокот го објави новиот број на загинати, кој се удвои од претходните извештаи.
Официјалните лица предупредуваат дека бројот може да се зголеми откако пожарите ќе бидат ставени под контрола и спасувачите ќе можат да ги прочешлаат урнатините.
Противпожарните операции продолжија и во текот на ноќта, при што хеликоптери кои фрлаа вода го искористија привременото затишје на ветровите.
Претседателот Џо Бајден изјави на брифингот во Белата куќа во четвртокот попладне дека федералните ресурси и дополнително финансирање и се ставени на располагање на Калифорнија за борба против шумските пожари што тој ги опиша како „најлоши пожари што некогаш го погодиле Лос Анџелес“.
Парите ќе бидат искористени, рече претседателот, за покривање на сите трошоци за 180 дена за привремени засолништа, отстранување на опасните материјали, плати за припадниците на прва помош и мерки за заштита.
На брифингот зборуваше и потпретседателката Камала Харис, поранешен американски сенатор за Калифорнија.
Харис ја опиша ситуацијата во Калифорнија како „апокалиптична“ и „нешто што ќе има влијание во наредните месеци и години“.
Потпретседателката има дом во зоната за евакуација, но не е јасно дали нејзината куќа претрпела некаква штета.
Властите соопштија дека шумските пожари што горат во и околу градот Лос Анџелес поттикнале евакуација на речиси 180.000 луѓе, уништиле илјадници домови и изгореле десетици илјади хектари земја.