Кинеските власти гневно реагираа и најавија контра мерки по најавата на Белата куќа дека администрацијата на Бајден ќе ги зголеми тарифите за одредени увозни производи од Кина, вклучително и четирикратно зголемување на доплатата за електричните автомобили.
Кинескиот министер за надворешни работи Ванг Ји одговори на потегот на САД.
„Би сакал да истакнам дека ваквите еднострани и протекционистички акции се спротивни на трендот на времето. Во овој критичен момент на глобално економско закрепнување, меѓународната заедница треба да ги предупреди Соединетите држави да не предизвикуваат нови неволји за светот“, изјави Ванг Ји, кинески министер за надворешни работи.
Покрај тарифата од 100 отсто за електричните возила, администрацијата на САД планира и нови давачки за акумулаторите на електричните возила. Тарифите ќе важат и за испорака на одредени видови полупроводници, соларни ќелии и опрема што се користи во здравствената индустрија, како што се игли и шприцеви.
Експертите рекоа дека постојат голем број начини на кои Кина може да одговори на новите царини, а некои од најверојатните се наметнување тарифи за американски стоки кои влегуваат во Кина; намалување на сопствените набавки на политички чувствителни земјоделски производи од САД, како што е сојата; или ограничување на продажбата на минерални производи од витално значење за производство на батерии за електични возила.