Велика Британија во средата објави нова испорака на помош во храна за Појасот Газа, додека американските власти се залагаат за зголемување на хуманитарната помош и нов прекин на огнот пред разговорите со израелските власти во Вашингтон следната недела.
Британското Министерство за надворешни работи соопшти дека 2.000 тони храна преминала во Газа со помош на Јордан и била дистрибуирана од Светската програма за храна.
„Клучно е да го задржиме протокот на помош во Газа за да ставиме крај на страдањата, и затоа оваа најнова испорака на помош од страна на ОН е толку многу важна“, рече британскиот министер за надворешни работи Дејвид Камерон во изјавата.
Американскиот државен секретар Антони Блинкен треба да одржи разговори оваа недела во Саудиска Арабија и Египет со фокус на постигнување нов прекин на борбите во Газа, ослободување на заложниците кои ги држат палестинските милитанти, засилување на меѓународните напори за добивање помош во Газа и да работи на решавање на управувањето, безбедноста и обновата во Газа по војната.
Како што продолжуваат борбите, американските власти изразија постојана загриженост за планот на Израел да изврши офанзива во Рафах, лоциран долж границата Газа-Египет, каде што се засолнети повеќе од еден милион Палестинци.
Таа загриженост, што ја повторуваа претставниците на ОН е фокусирана на потенцијална хуманитарна катастрофа, при што Рафах е главната влезна точка за малата помош што се внесува во Појасот Газа.
