Линкови за пристапност

Велика Британија и Европската унија потпишаа договор за трговија за Северна Ирска


ЛОНДОН (АП) - Велика Британија и Европската унија денеска ставија крај на повеќегодишните расправии, потпишувајќи договор за решавање на нивниот трговски спор по Брегзит за Северна Ирска.

Британскиот премиер Риши Сунак рече дека „одлучувачкиот пробив“ означува „ново поглавје“ во односите меѓу Велика Британија и ЕУ.

Сунак и претседателката на Европската комисија Урсула фон дер Лајен го потпишаа договорот на состанокот во Виндзор Англија. Фон дер Лајен на прес-конференција рече дека е „историско она што го постигнавме денес“.

Договорот, кој ќе овозможи стоката слободно да тече во Северна Ирска од остатокот на кралството, става крај на спорот што ги влоши односите меѓу Обединетото Кралство и ЕУ, што предизвика колапс на регионалната влада со седиште во Белфаст и го потресе деценискиот мировен процес на Северна Ирска.

Поправањето на тоа е голема победа за Сунак - но не и крај на неговите неволји. Продажбата на договорот на неговата Конзервативна партија и нејзините сојузници од Северна Ирска може да биде потешка борба. Сега Сунак ја чека пресудата на Демократската унионистичка партија на Северна Ирска, која ја бојкотира владата за поделба на власта во регионот додека трговските аранжмани не се променат на нејзино задоволство.

Сунак треба да даде изјава до Долниот дом подоцна во која ќе ги соопшти деталите за договорот.

Северна Ирска е единствениот дел од Обединетото Кралство што дели граница со членка на ЕУ, Република Ирска. Кога Обединетото Кралство го напушти блокот во 2020 година, двете страни се согласија да ја задржат ирската граница без царински пунктови и други проверки, бидејќи отворената граница е клучен столб на мировниот процес на Северна Ирска.

Наместо тоа, има проверки на некои стоки кои влегуваат во Северна Ирска од остатокот од ОК. Тоа ги налути британските унионистички политичари во Белфаст, кои велат дека новата трговска граница во Ирското Море го поткопува местото на Северна Ирска во Обединетото Кралство.

Демократската унионистичка партија ја сруши северноирската протестантско-католичка влада за поделба на власта пред една година во знак на протест и одби да се врати додека правилата не бидат укинати или суштински препишани.

XS
SM
MD
LG