Русија денеска соопшти дека 63 нејзини војници биле убиени на новогодишната ноќ во украински ракетни напади врз нивните квартови во градот Макивка под руска контрола на делот на украинската област Доњецк.
Невообичаената најава за жртви од страна на руското Министерство за одбрана дојде откако Русија продолжи со баражот од воздушни напади врз украинскиот главен град Киев, иако градоначалникот Виталиј Кличко рече дека сите 40 беспилотни летала насочени кон градот и неговата околина се соборени.
Руското Министерство за одбрана соопшти дека Украина ја погодила локацијата Макивка со четири од шесте ракети истрелани од прецизниот артилериски ракетен систем за висока подвижност (ХИМАРС) што Соединетите Држави им го испратиле на украинските сили. Русија соопшти дека соборила два од дојдовните проектили.
Украинската војска директно не го потврди нападот, но премолчено го призна и тврди дека е посмртоносен отколку што објави Русија.
Дирекцијата за стратешки комуникации на вооружените сили на Украина во неделата соопшти дека околу 400 руски војници загинале во зградата на стручното училиште во Макивка, а околу 300 се повредени. Во руското соопштение се вели дека нападот се случил „во областа Макивка“ но не се споменува стручното училиште.
Некои информации за овој извештај се од Асошиетед прес и Ројтерс.