АП - Поранешниот полицаец од косовските Срби, чиј притвор предизвика голема криза меѓу Србија и Косово, доби наредба да биде ослободен од затвор и да биде ставен во домашен притвор, изјави денес неговиот адвокат.
Апсењето на Дејан Пантиќ на 10 декември доведе до протести на косовските Срби кои поставија повеќе блокади на северот на земјата.
Пантиќ беше приведен за „тероризам“ откако наводно нападнал косовски полицаец за време на претходниот протест.
Неговиот адвокат, Љубомир Пантовиќ, телефонски изјави за Асошиетед прес дека повисокиот косовски суд му го заменил притворот на неговиот клиент со домашен притвор.
„Косовската полиција е обврзана да го префрли Пантиќ на адресата каде што живее“ во северно Косово населено со Срби, рече адвокатот.
Пантовиќ рече дека извршувањето на наредбата може да се покаже проблематично бидејќи косовските офицери ќе треба да ги преминат српските барикади додека го превезуваат Пантиќ.
Косовскиот премиер Албин Курти ја критикуваше одлуката на судот да го ослободи Пантиќ во домашен притвор.
„Јас сум љубопитен и сакам да знам кој е обвинителот што поднесол барање и судијата кој одобрил таква одлука да се стави некого во домашен притвор кога е обвинет за тероризам“, рече Курти на прес-конференција.
Апсењето на Пантиќ поттикна неколкунеделни тензични препукувања, проследени со пукотници и експлозии во близина на патролите на мировните сили предводени од НАТО и новинарите.
Никој не е сериозно повреден.
На крајот, Србија ја подигна борбената готовност на своите трупи на границата со Косово, барајќи прекин на „нападите“ против косовските Срби.
Не е јасно дали префрлањето на поранешниот полицаец во неговиот дом ќе ги смири тензиите, бидејќи косовските Срби и Белград издадоа неколку други барања, вклучително и ослободување на уште двајца Срби и забрана за влез на косовската полиција во областите населени со Срби на северот во Косово.
Извор: Асошиетед прес