Линкови за пристапност

САД објавија нови документи за атентатот на Кенеди, нема промена во заклучокот дека убиецот дејствувал сам


Сепак, најновите информации ќе бидат корисни за историчарите кои се фокусираат на настаните околу атентатот
Сепак, најновите информации ќе бидат корисни за историчарите кои се фокусираат на настаните околу атентатот

Американскиот национален архив вчера објави илјадници документи поврзани со атентатот на поранешниот претседател Џон Кенеди во 1963 година.

Објавувањето на 13.173 документи не се очекуваше да вклучи какви било нови ударни информации или да го промени заклучокот донесен од комисијата, предводена од главниот судија Ерл Ворен, дека Ли Харви Освалд, поранешен маринец и комунистички активист кој живеел во Советскиот Сојуз, дејствувал сам.

Сепак, најновите информации ќе бидат корисни за историчарите кои се фокусираат на настаните околу атентатот.

Кенеди беше застрелан и убиен додека се возеше во својата поворка низ Далас на 22 ноември 1963 година, на 46-годишна возраст.

Илјадници книги, статии, ТВ емисии и филмови ја истражуваа идејата дека атентатот на Кенеди е резултат на разработен заговор. Ниту еден не даде убедлив доказ дека Освалд, кој беше смртно застрелан од сопственикот на ноќниот клуб Џек Руби, два дена по убиството на Кенеди, работел со кој било друг.

Многу од документите објавени вчера ѝ припаѓаа на Централната разузнавачка агенција, вклучително и неколку кои се фокусираа на движењата на Освалд и неговите контакти. Другите документи се фокусираат на барањата на Комисијата на Ворен што го истражува атентатот.

Документите покажуваат дека владата на САД отворила таканаречено досие 201 за Освалд во декември 1960 година, речиси три години пред убиството на Кенеди, и по неуспешното пребегнување на Освалд во Советскиот сојуз во 1959 година.

Еден документ од декември 1963 година опишува како претставници на ЦИА во Мексико Сити „пресретнале телефонски повик“ што Освалд го направил во октомври од тој град до советската амбасада таму „користејќи го своето име“ и зборувајќи „лош руски“. Освалд се надевал дека ќе патува низ Куба, на пат за Русија, и барал виза, покажуваат документите.

Постоеше првична загриженост дека Руби, убиецот на Освалд, можеби има некаква врска со Освалд. Но, во новообјавениот меморандум од септември 1964 година до претседателската комисија која го истражува атентатот, се вели дека „Централната разузнавачка агенција нема индикации дека Руби и Ли Харви Освалд некогаш се познавале, биле поврзани или можеби биле поврзани на кој било начин“.

Конгресот во 1992 година нареди сите преостанати запечатени досиеја кои се однесуваат на истрагата за смртта на Кенеди да бидат целосно отворени за јавноста преку Националниот архив за 25 години, до 26 октомври 2017 година, освен оние што претседателот ги овластил за понатамошно задржување.

Сите преостанати датотеки на ЏФК првично требаше да бидат објавени во октомври 2021 година. Претседателот Џо Бајден го одложи планираното објавување, наведувајќи ги доцнењата предизвикани од пандемијата на ковид-19, и најави дека наместо тоа ќе бидат откриени во две серии: едната на 15 декември 2021 година , а уште една до 15 декември 2022 година.

Со вчерашното ојавување, 95 отсто од документите во збирката записи за атентатот ЏФК на ЦИА ќе бидат целосно објавени, рече портпаролот на ЦИА.

Бајден вчера рече дека до 1 мај 2023 година, Националниот архив и релевантните агенции „заеднички ќе ги разгледаат преостанатите записите што не биле јавно откриени“.

Извор: Ројтерс

XS
SM
MD
LG