Иран ги засили репресиите врз курдските области во западниот дел на земјата поради протестите предизвикани од смртта на 22-годишна жена, приведена од полицијата како неморална, изјавија активисти, пренесе Асошиејтед Прес.
АП пренесе дека полицијата употребила огнено оружје во најмалку една населба во Санандај, главниот град на иранската провинција Курдистан, додека Амнести интернешенел и советникот за национална безбедност на Белата куќа го критикуваа насилството насочено кон демонстрантите кои се гневни поради смртта на Махса Амини.
Во меѓувреме, некои нафтени работници се приклучија на протестите во двата клучни рафинериски комплекси.
Иранската влада инсистира дека Амини не била малтретирана, но нејзиното семејство вели дека нејзиното тело покажувало модринки и други знаци на тепање.
По социјалните медиуми се појавија видеа како безбедносните сили тепаат и туркаат демонстранти, вклучително и жени кои им ја скинале задолжителната шамија или Хиџабот.
Од главниот град Техеран и од други места, видеа се појавија на интернет и покрај тоа што властите го прекинуваат интернетот.
Видеата покажаа студенти и средношколци како демонстрираат и скандираат, а некои жени и девојки маршираат низ улиците без шамии додека протестите продолжуваат во четвртата недела.
Демонстрациите претставуваат еден од најголемите предизвици за теократијата на Иран од протестите на Зеленото движење во 2009 година.