Линкови за пристапност

Помош од три илјади денари за социјално загрозените граѓани во следните четири месеци


Финансиска помош ќе има сите ранливи категории граѓани и за пензионерите. Олеснување на достапност до кредити за малите и средни претпријатија. Основните и средните училишта одат на регулираниот пазар на струја. На денешната седница Владата усвои нов пакет антикризни мерки тешок 350 милиони евра


СКОПЈЕ - Ваучери со финансиска помош од три илјади денари во наредните четири месеци за социјално загрозените и ранливите категории на граѓани како и за пензионерите е една од сетот антикризни мерки кои денеска ги усвои Владата на 88 седница.

„Ќе се погрижиме за сите. Буквално сите да бидат згрижени. Ќе биде тешко кај нас. Ќе биде тешко и во многу други земји. Но тука дома ќе се погрижиме сите да имаат доволно греење и храна за да ја преживеат зимата. Посветени сме на наоѓање на начин како да ја здржиме ликвидноста на компаниите и животниот стандард на граѓаните“, кажа премиерот Димитар Ковачевски во прес центарот на Владата.

Со овој сет антикризни мерки по 3.000 денари месечно во нареднте четири месеци ќе добиваат лица кои користат право на социјална сигурност, лица кои го користат правото за попреченост, родители на децата со попреченост до 26 годишна возраст кои користат право на посебен додаток, лицата со попреченост кои користат право за помош и нега од друго лице, лицата со потешки трајни промени во здравствената состојба, самохрани родители корисници на ГМП, како и активните баратели на работа и стечајните работници или вкупно 42 илјади граѓани. За оваа мерка вкупно се издвоени над 8 милиони евра.

„ Директна финансиска поддршка од вкупно 6.000 денари во наредните 4 месеци односно по 1.500 денари месечно има и за пензионерите кои земаат до 11.525 пензија, а тоа се над 91.600 пензионери наши сограѓани. Воедно, директна финансиска помош од вкупно 3.000 денари обезбедивме за пензионерите кои земаат пензија од 11.525-14.000 денари, односно над 66.000 пензионери. За оваа мерка, за нашите пензионери издвоивме над 12,2 милиони евра кои би почнале да се даваат од ноемвриската пензија“, појасни премиерот Ковачевски.

Над 470 основни и средни училишна во државата се ставаат на регулираниот пазар со што ќе плаќаат далеку помали сметки за потрошена струја а државата ќе помогне со еден милион евра а помош ќе има и за јавните здравствени установи кои ќе купуваат струја директно од ЕСМ.

Антикризни мерки за помош и за микро, малите и средните компании.

„ Го прошируваме опсегот на компании кои се корисници на кредитно - гарантната шема од Гарантниот фонд на Развојната банка, преку олеснување на критериумите за аплицирање за обезбедување на обртни средства за што се предвидени околу 5 милиони евра. Обезбедуваме директна кредитна линија за поддршка на ликвидноста на микро, мали и средни трговски друштва ,согласно тековната состојба, како и трговски претпријатија и занаетчии кои плаќаат давачки на реален приход“, рече премиерот Ковачевски.

За големите компании не беа соопштени евентуални анти кризни мерки. Рокот кој беше доставен од Стопанските комори даден на состанокот на Економскиот совет истекува во среда.

„Сега не е време за финансирање на профитот. Правиме анализи на компаниите кои се најголеми потрошувачи. Кај дел од нив не е проблем само цената на енергенсите туку и во цената на рудата која ја копаат“, објасни премиерот Ковачевски.

Растечката инфлација иреалната опасност од стагфлација е исто трака во фокусот на Владата. Државниот завод за статистика (ДЗС) вчера објави дека трошоците на животот во септември годинава во однос на септември лани се зголемени за 18,7, а цените на мало за 14,7 проценти.
Владата се обиде да го пресретне растот на инфлација со воведувањето маржи на дел од основните продукти, таа листа се прошири со млечните производи.

Владата најави таргетирани мерки за индустриите кои произведуваат основни прехранбени производи за да им се помогне со субвенционирање на енергијата и енергените кои ги користат.

„ Владата пристапи со замрзнување на цените, но ако се замрзнат цените под трошоци на производство ќе има недостиг на храна. Се надевам дека во наредните една-две недели ќе дојдеме до решение прифатливо за производителите што ќе овозможи субвенционирање на енергенсите за нив, а тие да ја намалат или да не ја зголемуваат цената на основни пехранбени производи“, рече Ковачевски.

Министерот за економија Крешник Бектеши најави мерка за производителите на основните прехранбени производи која би стапила на сила од од 1 декември.

Од Владата соопштија дека очекуваат дел од сетот антикризни мерки за кој е потребна согласност во Собранието да помине и да нема опструкции од опозицијата.

Ова е втор пакет антикризни мерки кој го оси Владата а двата вкуно тежат 750 милиони евра

XS
SM
MD
LG