Распространетата мрежа за дезинформации со потекло од Русија се обиде да искористи стотици лажни профили на социјалните мрежи и десетици лажни веб-страници за вести за да ги рашири поентите на Кремљ за инвазијата на Украина, откри Мета, пренесе Асошиејтед Прес.
Според АП, компанијата, која ги поседува Фејсбук и Инстаграм, соопшти дека ја идентификувала и ја оневозможила операцијата пред да може да добие голема публика.
Сепак, Фејсбук рече дека тоа е најголемиот и најкомплексен руски пропаганден напор што го открил од почетокот на инвазијата. Операцијата вклучуваше повеќе од 60 веб-страници создадени за да имитираат легитимни сајтови за вести, вклучително и на весникот Гардијан во Велика Британија и германскиот Шпигел.
Меѓутоа, наместо вистинските вести објавени од тие медиуми, лажните страници содржеле линкови до руска пропаганда и дезинформации за Украина. Повеќе од 1600 лажни Фејсбук профили беа искористени за ширење на пропагандата до публиката во Германија, Италија, Франција, Велика Британија и Украина.
„Видео: Откриена лажна постановка во Буча! тврди една од лажните вести, која ја обвини Украина за колењето на стотици Украинци во градот окупиран од Русите.
Лажните наводи на социјалните мрежи потоа се користеле за ширење врски до лажните вести и други проруски објави и видеа на Фејсбук и Инстаграм, како и платформи вклучувајќи Телеграм и Твитер.
Мрежата била активна цело лето.