Линкови за пристапност

САД ќе ја поддржуваат Украина колку што е потребно, рече Блинкен


Украинскиот претседател Володимир Зеленски во своето секојдневно обраќање рече дека тој и американскиот државен секретар Антони Блинкен во ненајавената посета на Киев во четвртокот разговарале за различни теми, вклучително и прогласувањето на Русија како терористичка држава.

„Правната реалност секогаш мора да одговара на фактичката реалност. И факт е дека Русија стана најголемиот извор на тероризам во светот“, рече Зеленски. „Светот мора да добие недвосмислен сигнал дека рускиот терор нема да му биде простен.“

Во своето дневно обраќање Зеленски рече: „Повеќе од илјада квадратни километри од нашата територија се ослободени од 1 септември“. Претседателот рече: „Благодарен сум на сите што го направија тоа. Благодарен сум на армијата, разузнавачите и специјалните служби за секое украинско знаме што беше поставено овие денови“.

„Извонредните бранители на првата линија на Украина продолжуваат храбро да се борат за слободата на нивната земја“, рече Блинкен во изјавата по средбата со Зеленски. Највисокиот американски дипломат ја потврди посветеноста на претседателот Џо Бајден да ја поддржува Украина „колку што е потребно“.

Во меѓувреме, САД во четвртокот објавија дека планираат да испратат 2,2 милијарди долари долгорочна воена помош за Украина и 18 други европски земји загрозени од руската агресија, и уште 675 милиони долари директно до владата во Киев во новиот пакет муниција за борба против инвазијата на Москва.

Во извештајот се вели дека Блинкен „влегол во утврдената зграда на претседателската администрација на Украина преку серија темни ходници со вреќи со песок наредени над прозорците кои на крајот воделе во бела соба со златни облоги и кристални лустери“.

Зеленски ја изрази својата благодарност за „огромната поддршка“ што САД и ја испратија на Украина, пофалувајќи ги Бајден и американскиот Конгрес што и помогнале на Украина „да ја врати нашата територија и земјиште“.

Некои информации во овој извештај се од Асошиетед прес.

XS
SM
MD
LG