Новата вакцина против маларија развиена од британскиот Универзитет во Оксфорд е 80 проценти ефикасна во спречувањето на инфекцијата, покажуваат резултатите од испитувањето објавени во четвртокот во медицинскиот журнал „Лансет“. Научниците велат дека тоа претставува огромен напредок што има потенцијал да спаси милиони животи и да ја искорени болеста.
Вакцината, наречена Р21/Матрикс-M, веќе покажа охрабрувачки резултати од испитувањето по три примарни дози. Одржувањето на тој имунитет отсекогаш било голем предизвик и најновото испитување покажува дека засилената доза е ефикасна, објаснува професорот Адријан Хил, директор на Институтот Џенер на Универзитетот во Оксфорд и коавтор на трудот „Лансет“.
„Технологијата беше сложена за развој бидејќи ни требаат многу силни одговори на антитела за да се заштитиме од маларија и тие антитела, како и сите одговори, опаѓаат со текот на времето“, изјави Хил за Гласот на Америка.
„Една од грижите беше дека ова ќе биде краткорочна заштита и ќе трае само неколку месеци. Тоа дефинитивно не е случај со податоците што ги објавуваме денес“, рече Хил. „Навистина 80 проценти ефикасност во втората година од следењето по засилената доза е навистина многу охрабрувачка во тој поглед“.
Најновото испитување во втората фаза опфати 450 деца на возраст меѓу 5 и 17 месеци, регрутирани од регионот Наноро во Буркина Фасо. Не беа забележани сериозни несакани ефекти.
Резултатите од тековното испитување на третата фаза во кое се вклучени 4.800 деца треба да се добијат подоцна оваа година со надеж дека масовното производство и пуштање во употреба може да започне во 2023 година, по одобрението од СЗО.