(АП) - Претседателот Џо Бајден и другите водачи на западната хемисфера денес треба да го објават она што се смета како патоказ за земјите да бидат домаќини на голем број мигранти и бегалци.
„Декларацијата од Лос Анџелес“ е можеби најголемото достигнување на Самитот на Америка, што беше поткопано од разликите околу списокот со покани на Бајден. Наместо тоа, лидерите на Мексико и на неколку земји од Централна Америка испратија врвни дипломати во знак на протест, откако САД ги исклучија Куба, Никарагва и Венецуела од самитот.
Збир на принципи што ќе бидат објавени денес на последниот ден на самитот вклучува правни патишта за влез во земјите, помош за заедниците кои се најпогодени од миграцијата, хумано управување со границите и координирани реакции во итни случаи.
Тоа е план што веќе во голема мера го следат Колумбија и Еквадор, чии десничарски лидери беа топло поздравени на самитот.
Претседателот Гиљермо Ласо од Еквадор минатата недела објави привремен статус за мигранти Венецуелци во неговата земја, кој се проценува на околу 500.000. Тој на панел-дискусијата во вторникот рече дека неговата земја возвраќа на великодушноста на Шпанија и САД за топлиот пречек на голем број Еквадорци кои избегале пред повеќе од две децении.
Претседателот Иван Дуке од Колумбија доби овации на своето појавување во четвртокот за опишување како неговата влада доделила привремен статус на еден милион Венецуелци во последните 14 месеци а дополнително обработува уште 800.000 апликации.
САД се најпопуларна дестинација за барателите на азил од 2017-та година.
Но, САД се далеку од сами. Колумбија и соседните јужноамерикански земји се домаќини на милиони луѓе кои ја напуштиле Венецуела. Мексико поднесе повеќе од 130.000 барања за азил минатата година, многу од нив од Хаити, што беше тројно зголемување од 2020-та година. Многу луѓе од Никарагва избегаа во Костарика, додека раселените Венецуелци сочинуваат околу една шестина од населението на малата Аруба.
Американскиот секретар за внатрешна безбедност Алехандро Мајоркас во четвртокот рече дека декларацијата на самитот ги признава регионалните димензии на миграцијата.