Националната асоцијација за оружје продолжува со отворањето на својата годишна конвенција денес во Хјустон, само неколку дена откако тинејџер вооружен напаѓач влезе во основното училиште во Увалде,Тексас и уби 19 деца и двајца наставници.
Гувернерот на Тексас, Грег Абот, кој требаше да одржи лично обраќање на конвенцијата, го повлече своето обраќање и наместо тоа ќе отпатува во Увалде. Гувернерот, сепак, ќе биде присутен на конвенцијата со претходно снимена видео порака, според „Далас морнинг њус“.
Поранешниот американски претседател Доналд Трамп сепак треба да зборува на тридневниот настан на лобистичката група за правата на оружјето.
Во меѓувреме, органите за спроведување на законот во Тексас се соочуваат со отворените прашања за нивната реакција и за времетраењето што им требаше во вторникот да упаднат во училиштето за да го спречат 18-годишниот вооружен напаѓач Салвадор Рамос. Официјални лица велат дека Рамос, кој го напуштил средното училиште, бил во основното училиште Роб 40 минути до еден час пред полицијата да влезе во училницата за четврто одделение каде што уби 21-но лице.
Сведоците велат дека родителите на децата заробени во училиштето, сместено во станбена населба, и посматрачите кои се собрале во вторникот напладне, извикувале на полицијата да влезе во училиштето и да стави крај на масакрот.
Еден сведок пред училиштето, Хуан Каранза (24), кој ја гледал сцената надвор од неговата куќа од другата страна на улицата, рече дека жените викале на полицијата: „Влезете таму! Влезете таму!“
Виктор Ескалон, регионален директор на Одделот за јавна безбедност во Тексас, рече дека Рамос влегол во зградата преку отклучена врата и без да наиде на училишен службеник за безбедност, што е спротивно на претходните извештаи.
Во училиштето вообичаено има вооружен офицер на должност, но кога напаѓачот пристигнал, „немало офицер, лесно достапен и вооружен“, а напаѓачот влегол во зградата „непречено“, рече Ескалон.
Вооружениот напаѓач беше убиен кога пристигна тактички тим на американската гранична патрола, упадна во училницата и го уби напаѓачот, рече Ескалон.
Хавиер Казарес, чија ќерка од четврто одделение, Џеклин Казарес, беше убиена во нападот, рече дека ја покренал идејата со другите случајни минувачи самите да упаднат во зградата затоа што мислел дека полицијата не се движи доволно брзо.
„Ајде само да побрзаме бидејќи полицајците не прават ништо како што треба“, рече тој. Тие беа неподготвени, рекол тој.
Еден случаен минувач снимил видео објавено на неговиот профил на Фејсбук, во кое се гледа дека неговите родители се обидуваат очајно да ја натераат полицијата да дејствува побрзо за да ги спаси нивните деца.
Директорот на Одделот за јавна безбедност на Тексас, Стив Мекроу, во средата ја бранеше полицијата, велејќи: „Заклучокот е дека спроведувачите на законот беа таму. Тие се ангажираа веднаш. Тие навистина успеаа да го задржат Рамос во училницата“ пред да го убијат.
Ескалон, од Одделот за јавна безбедност во Тексас, рече дека двајца полицајци од Увалде пристигнале четири минути подоцна и втрчале во училиштето, но брзо биле приморани да се повлечат кога Рамос отворил оган во нив.
Властите продолжија да го бараат мотивот зад ужасното дивеење, најсмртоносното пукање во училиштата во САД во речиси една деценија. Тие рекоа дека Рамос нема позната историја на криминал или ментално здравје, иако некои познаници раскажуваа за неговото вознемирувачко антисоцијално однесување.
15-годишно девојче со германско потекло со кое Рамос разговарал на интернет, изјави дека Рамос и рекол дека „фрла мртви мачки по куќите на луѓето“.
Во моментот кога Рамос го започнал нападот, тој и испратил порака на девојката, предупредувајќи ја дека ќе пука во основно училиште.
Студентите од училиштата и колеџите низ САД вчера излегоа на протести во нивните кампуси за да побараат построги мерки за контрола на оружјето.
Белата куќа соопшти дека претседателот Џо Бајден и првата дама Џил Бајден ќе отпатуваат во Тексас во недела.
Некои информации за овој извештај се од Асошиетед прес и Ројтерс.