ВАШИНГТОН, (Ројтерс) - Украинската економија се очекува да се намали за 10 отсто во 2022-ра година како резултат на инвазијата на Русија, но изгледите би можеле нагло да се влошат доколку конфликтот трае предолго, се вели во извештајот на Меѓународниот монетарен фонд објавен во понеделникот. .
Во извештајот, подготвен пред одобрувањето на ММФ од 1,4 милијарди долари вонредно финансирање, се вели дека економското производство на Украина може да се намали за 25 отсто до 35 отсто, врз основа на податоците за реалниот воен бруто-домашен производ од Ирак, Либан и другите земји во војна.
Украина имаше надворешен финансиски јаз од 4,8 милијарди американски долари, соопштија од ММФ во нивниот извештај од 7-ми март, но се очекуваше нејзините потреби за финансирање да растат и ќе бара значително дополнително концесиско финансирање како резултат на војната.
ММФ работи на воспоставување инструмент за доверлив фонд преку кој билатералните донатори можат да ги канализираат ресурсите во Украина, рече претставник на глобалниот заемодавател.
Веќе одобрените 1,4 милијарди долари за итно финансирање е максимумот што Украина може да го позајми според сегашните правила на ММФ, но заемот има „каталитички“ ефект во охрабрувањето на другите донатори, рече претставникот.
Ивана Владкова Холар, шефица на мисијата на ММФ за Украина, рече дека украинските власти прават „извонреден напор“ да ја одржат економијата и финансискиот систем на земјата во состојба на војна.
Извештајот предвидува влошување на изгледите за раст на Украина од најмалку 13,5 процентни поени во однос на предвоената основна линија, со пад на производството за 10 отсто во 2022-ра година, со претпоставка за брзо решавање на војната.
Тоа се споредува со падот на производството од 6,6 отсто во 2014-та година, годината кога Русија го анектираше регионот на Крим во Украина, и нешто помалку од 10 отсто во 2015-та година.
Персоналот на ММФ рече дека постои голема несигурност за изгледите, со оглед на интензитетот на конфликтот, и предупреди дека зголемената загуба на физички капитал и огромните бегалски текови може да резултираат со „значително поизразена контракција на производството“, колапс на трговските текови и пониски даноци приходи.