Во студијата објавена во вторникот од страна на Центрите за контрола и превенција на болести во САД, стои дека дополнителната доза или бустер од вакцината против ковид-19, обезбедува солидна заштита од тешки болести, хоспитализација и смрт.
Федералната здравствена агенција следеше повеќе од 400.000 возрасни лица во Лос Анџелес кои беа заразени или со делта или со омикрон варијантата на коронавирусот помеѓу ноември и минатиот јануари. Истражувачите откриле дека невакцинираните жители кои биле заразени со видот делта помеѓу ноември и декември имале 83 пати поголема веројатност да бидат хоспитализирани отколку оние кои биле вакцинирани и примиле бустер.
Во меѓувреме, студијата покажа дека во јануари, кога омикрон ја престигна делта како примарна варијанта во Лос Анџелес, невакцинираните поединци имале повеќе од три пати поголема веројатност да бидат заразени и 23 пати поголеми шанси да бидат хоспитализирани отколку луѓето кои биле целосно вакцинирани или примиле бустер вакцина.
Франција, пак, стана најновата европска земја што ги олесни ограничувањата за коронавирусот. Од среда, задолжителното носење маски на отворено ќе заврши, а ограничувањата на капацитетот на публиката за концертни сали, спортски натпревари и други настани постепено се укинуваат, според извештајот на агенцијата Франс прес. Опуштените стандарди за ублажување стапуваат на сила и покрај тоа што Франција постигна рекорден број на нови дневни случаи минатиот месец.
Новите мерки во Франција доаѓаат еден ден откако Данска и Норвешка официјално ги укинаа повеќето од нивните ограничувања за пандемијата. Велика Британија, Ирска и Холандија, исто така, ги отфрлија повеќето од нивните ограничувања и мерки за ограничување.
Некои информации за овој извештај се од агенцијата Франс прес.