Експлозија одекна во петокот во шиитска џамија во јужниот авганистански град Кандахар, при што загинаа најмалку 32 лица, а повеќе од 70 се повредени, според извори од локалната болница и локалните медиуми.
Експлозијата одекна за време на петочната молитва, во која обично присуствуваат голем број луѓе. Сликите и видеата споделени на социјалните мрежи покажаа крвава сцена внатре во џамијата, со тела и делови од тела расфрлани додека верниците се обидуваат да ги спасат повредените.
Портпаролот на Талибанците, Билал Карими, потврди за Гласот на Америка дека бомбашкиот напад во Кандахар „убил и повредил неколку сонародници“. Тој рече дека истрагата за насилството е во тек „за да се идентификуваат виновниците и да се изведат пред лицето на правдата“.
Никој не ја презеде одговорноста за нападот.
Експлозијата се случи една недела по нападот во друг авганистански град Кундуз, во кој загинаа повеќе од 50 лица. Одговорноста за тој напад ја презеде Исламска држава од провинцијата Хорасан, локален огранок на групата Исламска држава.
Во интервју за Гласот на Америка претходно оваа недела, заменик-министерот за информации на Талибанците, Забихула Муџахид, негираше дека Исламска Држава е сериозна закана, и покрај повеќекратните напади.