Зад блокадите на патиштата и стотиците полицајци во кинескиот главен град Пекинг во петокот, над градот надвисна огномет налик на националното знаме, како дел од пробите кои се чуваат во тајност за 100-годишнината од Кинеската комунистичка партија.
Пекинг го затвори сообраќајот, ги украси улиците во патриотски цветни аранжмани и национални знамиња и ги зголеми надзорите и безбедноста оваа недела, во рамките на подготовките за стогодишнината на 1-ви јули.
Тајните проби претставуваат последни фази од едногодишниот напор за планирање и дизајнирање за партиската историја како и да ја зацврсти домашната лојалност кон кинескиот социјалистички систем.
„Без Комунистичката партија, нема нова Кина“, гласеа нови пропагандни постери низ градот.
Плановите за настанот не се откриени во целост, иако државните медиуми и владините агенции навестија голем настан на плоштадот Тјенанмен. За понеделник е закажан перформанс на стадионот „Птичјо гнездо“, изграден за Олимпијадата во 2008-ма година.
На годишнината и претходеше голем број на апсења оваа година според законот за клевета на националните херои.
Нема место за грешка
На 23-ти јуни, жителите на Пекинг се разбудија во украсени сокаци со координиран приказ на кинески национални знамиња, видливи од скоро секоја врата.
Почнувајќи од мај, тимовите облечени во портокалови работни униформи станаа вообичаена глетка низ целиот град, ажурирајќи го декор покрај патот и создавајќи цветни аранжмани составени од 2,3 милиони садници, според државните медиуми.
Во исто време, безбедносните органи го зголемија надзорот и другите ограничувања.
Минатата недела полицајците одеа од врата до врата во централниот кварт Донгченг во Пекинг, проверувајќи ги регистрациите на куќите и потврдувајќи го бројот на луѓето што живеат на секоја адреса, изјавија жителите од соседството за Ројтерс.
Претставник на полицијата во Донгченг за Ројтерс изјави дека ваквите инспекции се „нормални“.
Луѓето на списокот на жители низ целата земја кои страдаат од ментални болести, вклучувајќи шизофренија и биполарно растројство, добиле домашни повици и телефонски проверки од властите, вообичаена практика пред поголемите политички настани.
Градската влада во Пекинг не одговори на барањето за коментар.
Четворица трговци на врвната кинеска страница за е-трговија, Taobao.com, за Ројтерс изјавија дека им е забрането да испраќаат предмети, вклучувајќи шишиња со гас и други запаливи производи до жителите на Пекинг, почнувајќи од јуни. Сопственикот на Таобао, Алибаба, не одговори веднаш на барањето за коментар.
Низ Кина, локалните државни институции, вклучително болници, училишта и воени единици, ќе одржат специјални настани по повод годишнината, вклучително и сесии за политичко образование и изложби за историјата на партиите.
„Целата армија ќе го трансформира политичкиот ентузијазам од прославите во практични активности за унапредување на каузата за зајакнување на земјата и армијата во новата ера“, рече Рен Гуокианг, портпарол на Министерството за национална одбрана на 23-ти јуни.
Цензурата на веќе строго контролираниот кибер-простор во Кина се засили.
Две лица кои работат во центарот за цензура во Тијанџин, на фирмата за социјални медиуми ByteDance Ltd. и една со седиште во Пекинг за кинескиот пребарувач Baidu.com изјавија дека во последните месеци добиле нови директиви за отстранување на негативните коментари за годишнината.
„Нема простор за грешка“, рече еден од вработените во „ByteDance“, кој одби да биде именуван, бидејќи не им е дозволено да зборуваат за странски медиуми.
Facebook Forum