Британија соопшти дека е постигнат договор за време на преговорите во текот на ноќта со Европската комисија за нацрт текстот на политичката декларација, во која се дефинираат условите за „глатко и уредно“ излегување од ЕУ.
Премиерката Тереза Меј пред резиденцијата на Даунинг Стит за новинарите рече дека го брифирала нејзиниот кабинет за договорот и дека ќе следи изјава во Претставничкиот дом, при што ќе бидат соопштени деталите.
Меј рече дека договорот „ја одразува“ волјата на британскиот народ така како што била изразена на референдумот за Брегзит во јуни 2016 година. „Тоа ја враќа контролата на нашите граници, нашите пари и нашите закони, и исто така ги штити нашите работни места, нашата безбедност и интегритетот на Обединетото Кралство.“
Разговорите во текот на ноќта следеа по состанокот на Меј со претседателот на Европската комисија, Жан Клод Јункер. Меј рече дека двајцата ѝм наложиле на нивните преговарачки тимови да работат и во текот на ноќта доколку е потребно, за да се постигне договор.
Договорот треба да биде одобрен од лидерите на земјите членки на ЕУ на посебен состанок на Советот на ЕУ во недела. Меј исто така се соочува со предизвикот да го помине договорот за Брегизит низ нејзиниот парламент, каде многумина сметаат дека тој не оди доволно далеку за да ги прекине врските со континентот.
Во последен момент неделава ситуацијата се искомплицира откако шпанската влада се закани со вето на било каков договор ако не се осигураат идни преговори за Гибралтар, британска испостава која Шпанија ја смета за рамноправен дел од нејзината територија.
Меј, во изјава за новинарите, рече дека во средата навечер разговарала со шпанскиот министер Педро Санчез и дека е „уверена дека во недела ќе се постигне договор за целото Обединето Кралство, вклучувајќи го и Гибралтар.“
Неколку други влади на ЕУ се спротивставија на претходните контури на договорот, бидејќи веруваат дека ќе ѝ даде конкурентска предност на Британија со тоа што нема да биде доволно тесно поврзана со регулативите на ЕУ, работните права и еколошките стандарди, така што потенцијално трошоците за производство на британските производи ќе се намалат.
Британските критичари на договорот, пак, сметаат дека со него Велика Британија премногу се приближува до регулативите на ЕУ, без да ги формулира тие директиви. Тие се спротивставија и на предложениот јазик кој ќе ја спречи Британија да преговара за трговски договори со други земји.
Најголема загриженост во текот на преговорите имаше околу тоа како да се одржи слободниот проток на стоки меѓу Северна Ирска, која е дел од Велика Британија и Република Ирска, која е членка на ЕУ. Отворањето на таа граница помогна да се стави крај на деценискиот конфликт меѓу двете популации.
Меј води малцинска влада и се потпира на гласовите на десетина пратеници од Северна Ирска кои длабоко се противат на договорот за Брегзит. За да ја покажат својата моќ, тие се воздржаа од поддршка при гласање за буџетот двапати оваа недела.
Facebook Forum