Фаворитката на Демократската партија Хилари Клинтон во нејзиниот говор во Сан Диего, Калифорнија посветен на надворешната политика, го портретираше Доналд Трамп како опасен и неквалификуван за претседателската функција.
„Идеите на Доналд Трамп не се само необични, туку тие се и некохерентни на опасен начин“, кажа поранешната државна секретарка.
Клинтон ја истакна нејзината поддршка за одлуката на претседателот Барак Обама да изврши напад врз домот на Осама бин Ладен во 2011-та.
Таа кажа дека темпераментот на Трамп покажува дека тој не може да донесува брзи и добри стратешки одлуки.
Антиципирајќи го нејзиниот говор, Трамп ја нападна поранешната државна секретарка на Твитер: „Неискрената Хилари Клинтон, која сакам да ја наречам лажливата Клинтон, се подготвува целосно да ја искриви мојата позиција за надворешната политика“, напиша тој на неговиот профил.
Анкетите покажуваат дека заканата од тероризам е голема грижа кај Американците, а Клинтон ја критикуваше позицијата на Трамп и по ова прашање.