Џиџи Стетлер е среќна што е жива.
Пред 30 години била нападната од бездомник на кого му помагала со храна, облека и засолниште. Ја нападнал во нејзиниот стан, ја избодел со нож и ја оставил во бессознание.
Стетлер преживеала и за време на нејзиното долго и бавно заздравување одлучила дека опоравувањето за неа треба да биде остварување на сонот – да стане успешна во светот на бизнисот.
„Не сте свесни колку сте силни се` додека не се борите за сопствениот живот”, вели таа и додава дека за време на премрежјето низ кое минувала, постојано се потсетувала „јас имам мисија, имам цел и нема сега да запрам.”
Денес, таа има 54 години и е сопственик на претприемаштво за рекреативни возила во Флорида, компанија која таа самата ја изградила од темел.
Нејзиното застапништво продава, дава под наем и сервисира рекреативни возила. Во Северна Америка под овој термин се подразбира моторно возило или камп приколка што има простор за живеење и удобност што може да се најде во секој дом.
Да се успее во светот на мажите
Најголем број од бизнисот со автомобили и рекреативни возила е под раководство на мажи. Стетлер е многу горда што е прва жена во САД - основач и директор на салон за рекреативни возила.
„Предизвик е да имаш бизнис во кој мажите се доминантни” вели таа.
Во книгата под наслов „Незапирлива! Преживувањето е само почеток” таа пишува за нејзиниот живот во светот на мажите.
Базирано на нејзиното искуство, таа не е изненадена од податоците на истражувањата за местото на жената во бизнисот. Глобалната компанија за сметководство „Грант Торнтон” направила анкети во фирми кои се на листата на берзи во САД, Индија и Велика Британија. Податоците се дека компаниите со мешовити раководни тимови ги надминуваат конкурентите кои се раководени само од мажи, за 655 милијарди долари.
Факт е дека жена може да трансформира и раководи со каква било компанија, вели Стетлер.
Но, за жал, на жените отпаѓа само нешто помалку од дваесет проценти од лидерските позиции во компаниите во Америка.