Комесарот за човекови права на Советот на Европа, Нилс Мужниекс, изрази голема загриженост за состојбите во Македонија. Во изјава за новинската агенција „Мета“ тој кажа:
„Многу сум загрижен за наводите за масовно и недозволено прислушкување на новинари и граѓани во поранешната југословенска република Македонија. Ова се сериозни наводи кои заслужуваат ефективна и независна истрага. Овде во прашање се доведуваат повеќе човекови права, а медиумската слобода и заштитата на новинарските извори не се најмалите“.
Комесарот за човекови права ги повика македонските власти брзо да го расчистат случајот.
„Македонските власти мораат брзо да ги расветлат случувањата, и во случај наводите да бидат утврдени, одговорните мораат да сносат одговорност, а употребата на таа пракса да прекине“, изјави Мужниекс за „Мета“ по состанокот во Брисел со Европската федерација на новинари.
За медиумските слободи во Македонија се огласи и оваа европска новинарска асоцијација. Нејзиниот претседател Могенс Бјерегард, кажа:
„Ова нарушување на правата директно ја засега медиумската слобода во Македонија, со тоа што потхранува клима на страв и самоцензура. Ако наводите се утврдат, тогаш македонските власти јасно го нарушиле правото на новинарите да си ги заштитат изворите“.