Линкови за пристапност

Илјада години од смртта на Цар Самуил

  • Сашо Митан

Големиот јубилеј беше одбележан со историски час во Самуиловата тврдина во Охрид

На свеченото одбележување на овој голем историски настан за Република Македонија, кој започна со интонирање на македонската химна, присуствуваа ученици од основните училишта од општина Охрид, претставници на локалната власт, како и дел од туристите кои се затекнаа денеска напладне во овој голем историски споменик.

Најмладите граѓани ги проследија најважните информации за Цар Самуил преку предавањата на нивните професори по историја, а за значењето на овој цар зборуваше и градоначалникот Никола Бакрачески кој рече дека соседните земји се обидуваат да ја присвојат македонската историја во обидот да заработат дневно-политички поени.

„Во последно време од дневно-политички карактер, многу историчари од нашите соседни земји и од други држави, прават обиди да ја присвојат историјата на Република Македонија, вклучително и наследството на Цар Самуил, оносно неговото потекло и периодот на неговото живеење. Она што јас сакам да го порачам е дена секојпат при градење на едно научно историско сознание треба да се користат историски факти и аргументи врз основа на кои понатаму се гради одредена теза или теорија која треба да биде потврдена, а така и со припадноста на Цар Самуил. Ние како граѓани на Република Македонија и како охриѓани го сметаме како наш основоположник на македонското средновековно царство и како таков го прославуваме“, нагласи Бакрачески.

Самуиловата тврдина на калето каде што денеска се одбележа 1.000-годишнината од смртта на Цар Самуил е едно од најрепрезентативните спомен-обележја на Охрид и најпосетена туристичка атракција, а влегува во симболите за градот, како што се грбот и знамето на Општина Охрид.

Паралелно течат и подготовките за големиот филмски спектакл, играниот филм посветен на Цар Самуил. Режисер на филмот е Антонио Митриќески, а продуцент Дејан Милошевски, кој откри дека филмот ќе се снима во Охрид и околината.

„Како режисер, за мене е фасцинантно да ја доловам таа енергија и тоа време. Навистина некои локации што веќе ги одбравме се прекрасни. Главните локации ќе бидат во Охрид, на Самуиловата Тврдина, на планината Галичица, околу Охридското и Преспанското Езеро. Ќе има плејада на глумци од Македонија“, изјави режисерот Митриќески.

Според него, филмот ќе биде главна драма помеѓу Цар Самуил и Василиј Втори, но преку него ќе се опфатат и дел од семејните односи, но и интригите во дворот на Цар Самуил.

XS
SM
MD
LG