Првиот човек на ОН вели дека ќе помогне, Груевски подготвен да продолжи со преговорите

Заложбата дадена во Охрид, лично да се ангажира за да го забрза наоѓањето на решение во спорот околу името меѓу Македонија и Грција, генералниот секретар на ОН Бан Ки-мун ја елаборираше и во обраќањето пред пратениците во Собранието.

„Вие имате цел да се приклучуте во ЕУ и НАТО и знам дека имате и пречка во оваа ваша цел. Императив е да се разреши прашањето на името. Јас сум посветен да помогнам, да олеснам во решавањето на ова прашање. Може да сметате на ОН и во исто време ќе ги охрабрам премиерот, претседателот на државата и претседателот на Собранието да бидат обединети и посветени на негово решавање“, рече првиот човек на Светската организација.

Во владиното соопштение за средбата на Ки-мун со премиерот Никола Груевски, пак, се наведува дека тие разговарале за „прогресот на Република Македонија и за спроведените реформи во областите од значење за земјата“, како и дека “генералниот секретар изрази позитивна оценка за напредокот на Република Македонија и го поздрави и вреднуваше постигнатиот прогрес на земјата“. Во сооштението стои и дека Груевски искажал „подготвеност за продолжување на динамизирани разговори со цел изнаоѓање на заемно прифатливо решение за спорот со Грција.

Подготвеноста на Ки-мун да се ангажира во спорот околу името ја поздравија и владејачките партии, и оние од опозицијата.

За Антонио Милошоски од ВМРО-ДПМНЕ, посетата е јавен притисок врз Грција. За Талат Џафери од ДУИ, таа е заложба на Ки-мун да ги интензивира контактите меѓу двете страни. Јани Макрадули од СДСМ смета дека заложбата на генералниот секретар е од исклучително значење за забрзување на процесот на изнаоѓање на решение.

Посредникот Метју Нимиц, кој го придружуваше Ки-мун и имаше средби со државното раководство, по нив кусо изјави дека разговорите биле конструктивни и дека ќе ја пренесе пораката од Скопје на грчкиот преговарач Адамантиос Василаксис, со кого попладнево ќе разговара во Солун.