Човекот обвинет за организатор на нападите од 11 септември, Калид Шеик Мохамед, и двајца негови соучесници, кои се наоѓаат во американскиот воен затвор во Гвантанамо, Куба, се согласиле да ја признаат вината, соопшти Пентагон.
Пентагон не прецизираше што е вклучено во договорот за вина.
Еден американски официјален претставник, кој сакаше да остане анонимен, рече дека договорите речиси сигурно ќе вклучуваат признавање на вината во замена за укинување на смртната казна.
Мохамед е најпознатиот затвореник во затворот Гвантанамо, кој беше основан во 2002 година од администрацијата на тогашниот американски претседател Џорџ Буш помладиот за да ги држи милитантите осомничени за нападите на 11 септември 2001 година.
Во Гвантанамо моментално има околу 30 затвореници.
Мохамед е обвинет дека организирал заговор за уривање на киднапираниот комерцијален авион во Светскиот трговски центар во Њујорк и Пентагон. Во нападите беа убиени околу 3.000 луѓе, а САД влегоа во војната во Авганистан која траеше речиси две децении.
Начинот на кој Мухамед беше испрашуван во Гвантанамо беше во центарот на вниманието на многу институции. Во извештајот на Комитетот за разузнавање на Сенатот од 2014 година за употребата на водобординг од агенти на ЦИА се наведува дека методот бил користен врз Мохамед најмалку 183 пати.
Договори за признавање вина постигнаа и двајца притворени: Валид Мухамед Салих Мубарак Бин Аташ и Мустафа Ахмед Адам ал Хавави, според соопштението за печатот на Пентагон.
Тројцата мажи беа заеднички обвинети и изведени пред суд во јуни 2008 година и повторно на 5 мај 2012 година, се вели во соопштението на Пентагон.
Водачот на републиканското малцинство во американскиот Сенат Мич Меконел ги осуди договорите за признавање вина.
„Единственото нешто полошо од преговарањето со терористите е да се преговара со нив додека се во притвор“, рече тој, обвинувајќи ја администрацијата на демократскиот претседател Џо Бајден за „кукавичлук пред теророт“.
Извор: Ројтерс