СКОПЈЕ – Утре или најдоцна задутре ВМРО – ДПМНЕ и коалицијата „Вреди“ да ја одржат најавената прес конференција на која ќе ја соопштат поделбата на ресорите во идната Влада како и кадровските решенија. Во исчекување на официјалните информации веќе се наѕираат контурите на следниот владин кабинет кој ќе го предводи лидерот на ВМРО – ДПМНЕ, Христијан Мицкоски.
„Можеби денеска или утре ќе биде објавено дефинитивно договорот меѓу идните владини партнери, помеѓу „Вреди“ и ВМРО – ДПМНЕ. Се надевам и друга партија но немам информација од ВМРО – ПДМНЕ дали е постигнат договор со „ЗНАМ“. Следните 24 до 48 часа сигурно ќе биде објавено “, изјави Арбен Таравари, од коалицијата „Вреди“
Иако неофицијално договорот е постигнат за спикерското место во Собранието кое ќе припадне на „Вреди“ а во него ќе седне Африм Гаши, лидерот на „Алтернатива“. На Алтернатива ќе и припадне и ресорот евроинтеграции како и заменичките места во министерството за образование и политички систем.
Биљал Касами ќе го врати пратеничкиот мандат и ќе остане градоначалник на Тетово, а „БЕСА“ партијата ќе раководи со министерството за економија каде се споменува името на Орхан Муртезани како министер. „БЕСА“ ќе раководи и со министерството за труд и социјална политика, а заменик министер ќе има во министерството за култура.
Изет Меџити се посочува како вицепремиер во идната Влада а неговата партија „Демократско движење“ ќе раководи со министерството за екологија и ќе ги добие заменичките места во МВР и во министерството за транспорт и врски.
„Алијанса“ на Арбен Таравари ќе раководи со здравство и ќе има едно вицепремиерско место а заменици министри ќе бидат во одбрана и во министерството за земјоделство.
„ За директори уште немаме зборувано. За министри, од Алијанса, кажав дека ќе имаме заменик-премиер, односно министер за добро владеење и транспарентност и министер за здравство и двајца заменици министри за одбрана и за земјоделство и двајца државни секретари. За еден знам, за здравство, за другиот не сум сигурен“, изјави Таравари.
ВМРО – ДПМНЕ ќе раководи со останатите министерства а во дел како правда, МВР, одбрана, МНР и финансии се најавуваат нови кадри кои досега не извршувале високи државни функции.
Извори за „Гласот на Америка“ брифираат дека поделбата на ресорите е завршена а во изминатите два дена преговорите и разговорите се однесуваат на понудените кадровски решенија од предложени од идните владини партнери, односно имињата на министрите и замениците министри.
Иако и членови на раководството на ВМРО – ДПМНЕ и дел од лидерите на Коалицијата „Вреди“ во неколку наврати ја посочија можност и движењето „ЗНАМ“ да биде дел од идната Влада, од „ЗНАМ“ соопштија дека досега не добиле никаква покана и затоа не можат да го соопштат својот став.