ВАШИНГТОН – Американскиот Сенат речиси едногласно усвои реформи за безбедност на децата преку интернет, иако законот, кој наиде на различни реакции од технолошката индустрија, се соочува со неизвесна судбина во Претставничкиот дом.
Два нацрт-закони - Законот за заштита на онлајн приватноста на децата и тинејџерите и Законот за безбедност на децата преку интернет, со прекар „COPPA 2.0“ и „KOSA“ - ќе треба да поминат во Претставничкиот дом каде контролата ја имаат републиканците, институција која моментално е на пауза до септември, за овие предлози да станат закон.
Сенатот ги одобри нацрт-законите со ретки двопартиски гласови со 91 наспрема 3.
„COPPA 2.0“ ќе забрани насочено рекламирање на малолетници и собирање податоци без нивна согласност, а на родителите и децата ќе им даде можност да ги избришат своите информации од платформите на социјалните медиуми.
„Децата не се ваш производ, децата не се вашиот извор на профит, а ние ќе ги заштитиме во виртуелниот простор“, рече сенаторката Марша Блекбурн, републикански ко-спонзор на „KOSA“, на прес-конференција по гласањето во вторникот.
Морин Молак, ко-основач на „ParentsSOS“, група родители кои рекоа дека смртта на нивните деца е поврзана со социјалните мрежи, го нарече гласањето „историска и емотивна пресвртница за мене и за сите родители кои неуморно се бореа да ги заштитат нашите деца“.
Според студијата на Харвард објавена минатата година, најдобрите американски платформи за социјални медиуми остварија околу 11 милијарди долари приходи од реклами од корисници помлади од 18 години во 2022 година.
„KOSA“ експлицитно би ја навела „должноста за грижа“ што ја имаат компаниите за социјални медиуми кога станува збор за малолетници кои ги користат нивните производи, фокусирајќи се на дизајнот на платформите и регулацијата на компаниите.
Извршните директори на социјалните мрежи „Snap“ и „X“ рекоа на сослушување во Конгресот во јануари дека ја поддржуваат „KOSA“, додека сопственикот на „Facebook“ и „Instagram“ „Meta Platforms“, извршниот директор Марк Закерберг и извршниот директор на „TikTok“, Шоу Зи Чу, рекоа дека не се согласуваат со делови од неа.
Критики за нацрт-законите
Групите од технолошката индустрија и Американската унија за граѓански слободи го критикуваа законот, велејќи дека различните толкувања на штетната содржина може да резултираат со губење на пристапот до содржините за малолетниците поврзани со вакцини, абортуси или ЛГБТ прашања.
Сенаторите го изменија јазикот на законот како одговор на таквата загриженост претходно оваа година, делумно со ограничување на одговорноста за извршување на државните обвинители.
Сепак, и по промените, критиките останаа.
„Тие направија подобрувања, но недоволно“, рече сенаторот Рон Вајден, демократ. „Сè уште мислам дека тоа ќе им наштети на многу ЛГБТК деца поради начинот на кој ќе се отежне пристапот до информации“.
Тој беше еден од тројцата што гласаа против предлог-законот во вторникот.
Фондацијата за информатичка технологија и иновации, тинк-тенк што добива средства од „Meta“, „Google“ и други големи технолошки компании, нацрт-законите ги нарече погрешни. „KOSA“ ќе ја отвори вратата за цензура, а „COPPA 2.0“ ќе ги намали приходите за услугите наменети за тинејџери, наведоа од групата.
„На оваа земја ѝ треба законодавство за безбедност и приватност на децата на интернет, кое го постигнува правилниот баланс меѓу заштитата на потрошувачите без да ги нарушува нивните права за слобода на говорот или да ги задушува иновациите“, рече високиот менаџер за политика на Фондацијата за информатичка технологија и иновации, Еш Џонсон.